Sesta-Feira, loron 12 fulan Abril tinan 2024 boxista hamutuk na’in 3 (Antonio Hau, Deonisio Ramos, Shevanio Henriques) ho treinador na’in 2 (Nelson V. ho Benjamin Alves de Assis) partisipa formasaun ADEL nebe fasilita hosi Komisaun Nasional Desportu (KND) iha salaun inkontru MJDAK.
Relasiona ho eventu ASBC Asian U-22 & Youth Boxing Championship nebe tuir planu sei realiza iha sidade Astana, Kazakhstan hahú iha loron 25 fulan Abril to’o loron 10 fulan Maio tinan 2024. Formasaun ida ne’e nu’udar rekezitu hosi komisaun organizadora ba eventu refere (Asian Boxing Confederation) husu atu atleta/partisipante hotu-hotu nebe sei ba partisipa iha obrigasaun tomak hetan edukasaun konaba anti-doping ninian. Formasaun ida ne’e nia objetivu mak atleta boxista no treinador sira hatene konaba knaar no responsabilidade nu’udar atleta nomos treinador sira nian relasiona ho anti-doping ninian, iha konhesimentu mos konaba lista proibidu sira nomos prosesu ba teste anti-doping nian.
Komisaun Nasional Desportu garante katak sei halo akompanhamentu no fo asistensia tomak ba atleta sira ne’e hodi kompleta sira nia formasaun minimu iha materia International – Level Athletes Education Program ho modul hamutuk 14 no wainhira partisipante sira kompleta materia ida ne’e sei hetan sertifikadu hosi Ajensia Mundial Anti-Doping (WADA) nian.